მთელი წელია არასამთავრობო ორგანიზაციები საგზაო მოძრაობის წესების გამკაცრების მოთხოვნით, აქციებს მართავენ და კანონის იმ მუხლების გამკაცრებას ითხოვენ, რომელიც ქვეითსაც და მძღოლსაც განსაკუთებულ საფრთხეს უქმნის. ავტოსაგზაო შემთხვევების სტატისტიკა სავალალოა... 2015 წლის მაჩვენებლით, გარდაცვლილებისა და დაშავებულების რაოდენობით ევროპაში პირველ ადგილზე ვართ.
ამასთანავე, შსს-ს ინფორმაციით, 2015 წელს, ბოლო 8 წლის განმავლობაში ავტოავარიების რეკორდული რაოდენობა დაფიქსირდა - 6432, რომელშიც დაშავდა 9187 ადამიანი და დაიღუპა 602 ადამიანი.

 

2016 წლის 7 თვის მონაცმებით კი, რეგისტრირებულია 3 725 ავტოსაგზაო შემთხვევა, რომელთა შედეგადაც დაიღუპა 306 და დაშავდა 5314 ადამიანი.

 

ორიოდე დღის წინ, საშინელი ავარია მოხდა დაბა ურეკთან, რომელსაც 4 ადამიანის სიცოცხლე ემსხვერპლა. გარდაცვლილთაგან ორი, საჩხერის მუნისციპალიტეტის, სოფელ ქორეთის მკვიდრი: 17 წლის მურად მოსიაშვილი და 40 წლის ზაზა გაბაძეა; ორიც ადგილობრივია, სოფელ წვერმაღალას მცხოვრები: გოჩა ბეჟანიშვილი და სიმონ ბერძენიშვილი. დედაქალაქის ერთ-ერთ საავადმყოფოში უმძიმეს მდგომარეობაში იმყოფება დაღუპული მურად მოსიაშვილის ძმა, 19 წლის ნიკა მოსიაშვილი. ქორეთელები ამბობენ, რომ სოფელ ურეკსა და წვერმაღალას შორის, სადაც ავტოკატასტროფა მოხდა, 3 წლის წინ, ასევე ავტოკატასტროფაში დაიღუპა მოსიაშვილების ახალგაზრდა ბიძაც.

 

გვესაუბრება სოფელ ქორეთის მკვიდრი ნოდარ ლ:


- მხოლოდ მოსიაშვილების ოჯახი კი არა, მთელი სოფელი უმძიმეს მდგომარეობაში ვართ. დიდი უბედურება დაატყდა თავს ამ მოსიაშვილებს, - 3 წლის წინ გარდაცვლილი ოჯახის წევრის დარდი არ ჰქონდათ განელებული, რომ ახლა 17 წლის შვილი დაეღუპათ და მეორე უმძიმეს მდგომარეობაშია, ჯერაც არ მოსულა გონზე. მეორე გარდაცვლილი ზაზა გაბაძე მოსიაშვილების კარის მეზობელია.

 

- როგორ მოხდა, რომ სულ სხვადასხვა კუთხეში მცხოვრები ადამიანები ავტოკატასტროფაში ერთად მოხვდნენ?


- ალბათ ბედისწერით, - მოსიაშვილების ოჯახს ძალიან უჭირს, სახლის აშენებაზეც სოფელი დაეხმარა; მაგრამ მერე რა, - ეს საბრალო ბიჭი ისე გარდაიცვალა, ახალ სახლში საცხოვრებლად შესვლაც ვერ მოასწრო. ოჯახს ოზურგეთში, სოფელ ურეკში ჰყავს ნათესავები და ბიჭები მათთან წავიდნენ სტუმრად. უთქვამთ, - საახალწლოდ მანდარინს ჩამოვიტანთო და ზაზა გაბაძისთვის უთხოვიათ, - შენც წამოდიო. ზაზასთვის იმიტომ, რომ სოფელ წვერმაღალაში ჰყავდა ძმაკაცები, სწორედ ისინი, ვინც ავარიისას დაიღუპნენ, ისიც გაჰყოლია. ზაზა ამ ბიჭებთან ერთად დადიოდა თურქეთში სამუშაოდ, პურის ფულს შოულობდნენ, იქ დაუახლოვდნენ ერთმანეთს.

 

- ალბათ ზაზას წვერმაღალელი მეგობრები უმასპინძლებდნენ, სავარაუდოდ, სუფრაზე ალკოჰოლურ სასმელსაც დალევდნენ.


- საჭესთან წვერმაღალელი ბიჭებიდან ერთ-ერთი იჯდა, მაგრამ ეგ უკვე გარკვეულია - მძღოლს ერთი გრამიც არ ჰქონდა დალეული.

 

- აბა, რა მოხდა?


- ის რომ, ქართველებს ემოციური და აჩქარებული ხასიათი გვღუპავს, - ბიჭები წვერმაღალიდან ძველი "ოპელით" წავიდნენ ურეკში, მოსიაშვილების ნათესავებთან, წვერმაღალასა და ურეკს შორის კი ისეთი მოსახვევი ყოფილა, რომელშიც, რომ იტყვიან, სიკვდილია ჩასაფრებული და სხვაც ბევრი დაღუპულა, - ამ ადგილზე არც გასწრება შეიძლება, არც სიჩქარის მომატება, რადაგანაც წინ მომავალ მანქანებს ვერ ხედავ. ბიჭები მოსახვევში "ტრაილერს" წამოეწივნენ, როგორც ჩანს, იფიქრეს, - გადავუსწრებთო და გადაუსწრეს კიდეც, მაგრამ ამ დროს საპირისპირო მიმართულებით მომავალ კიდევ ერთ "ტრაილერს" შეეჯახნენ, რომელსაც ვერ ხედავდნენ.

 

ამ ორმა "ტრაილერმა" "ოპელი" შუაში მოიმწყვდია და გასრისა. ისიც კი გასაკვირია, ვიღაც ცოცხალი რომ გადარჩა. მურადი უკარგესი ბიჭი იყო, ეს ულამაზესი, ორმეტრიანი ბიჭი ისე წავიდა ამ ქვეყნიდან, რომ კარგი ვერაფერი ნახა. ღმერთმა ინებოს და მის მშობლებს ნიკა წამოუყენოს ფეხზე. საშინელ მდგომარეობაში არიან, ფაქტობრივად, თავადაც აღარ არიან ამქვეყნად...

 

ფოტოზე: მურად მოსიაშვილი